1/26/2012

Michael Parnis

Dep. Secretary General

Print

Illum jittieħed vot fil-Parlament! Diskussjoni ilha għaddejja ġimgħat sħaħ u llejla mhu se jiġri xejn biex din id-diskussjoni tieqaf. Il-vot tal-lejla jista’ biss jagħti indikazzjoni ta’ x’se jiġri u xejn aktar. Finalment huwa l-Prim Ministru li jieħu deċiżjoni finali.

Nista’ nimmaġina mill-liema inkwiet għaddej il-Prim Ministru iżda nemmen li ma jistax iħalli din l-inċertezza li hawn fil-pajjiż. Kollox jindika li resqin lejn elezzjoni mingħajr ma għandna data fissa. Ħafna mid-dipartimenti u ministeri jidher li qegħdin jaħ­dmu biss fuq l-elezzjoni. L-appuntamenti għal-laqgħat ma diriġenti saru diffiċli ħafna u mhux qegħdin isiru passi ’l quddiem. Dan hu l-effett li jħalli meta wieħed ikun qed jistenna elezzjoni. Ħafna mill-ħaddiema li semmejt ikunu aktar moħħhom kif il-Ministru se jerġa’ jiġi elett milli dak li jista’ jiġri fil-kumplament ta’ Malta.

Aktar ma din is-saga tin­temm malajr, aktar inkunu nistgħu nkomplu b’xogħol­na. L-elezzjoni tiġi u tmur iżda mill-għada aħna fil-GWU, bħall-kumplament ta’ Malta, irridu nerġgħu nid­ħlu għax-xogħol. Għalhekk kull ġurnata li tgħaddi tfisser aktar stennija għad-data. Nispera li l-Prim Ministru jifhem din is-sitwazzjoni (m’għandix dubbju li jaf eżatt x’qed jiġri) u mingħajr ebda dewmien iħabbar id-data. Inutli f’dan l-istadju noqogħdu nisimgħu diskorsi u attakki. Mhux żmien li noqogħdu nisimgħu x’għamel il-Gvern matul dawn l-aħħar erba’ snin. Il-kwistjoni hi n-nuqqas ta’ appoġġ li qed jagħti wieħed mill-membri eletti mill-PN fil-Parlament. Il-kwis­t­jo­ni mhix il-PL jew il-mexxej tiegħu, iżda n-nuqqasijiet li elenka l-Onor. Franco Debono u n-nuqqas ta’ fiduċja li għandu fil-Prim Ministru u membri oħrajn tal-Kabinett. Dawn huma l-kwistjonijiet li għandhom jiġu indirizzati u xejn aktar. Personalment ma kontx naqbel li l-PL iressaq vot ta’ sfiduċja fil-Gvern imma kif qegħdin jiżviluppaw iċ-ċirkostanzi, nammetti li kont żbaljat. Aktar ma din il-kwistjoni tinqata’ malajr, aħjar għal kulħadd.

Matul dawn l-aħħar ġranet kont qed insegwi ftit il-ġirja biex jinħatar kanditat li għandu jisfida lil Barak Obama fl-elezzjonijiet li daqt isiru fl-Istati Uniti. Fl-ewwel jiem l-attakki tal-kontestanti mill-istess Partit Repubblikan kie­nu ffokati fuq l-istess Obama, iżda wara ftit daru u l-attakki bdew isiru fuq il-kandidati infushom. Fil-fatt kont ftit sospriż meta bdew jattakkaw lil Obama personali għax hu m’għandu x’jaqsam xejn mal-ġirja bejniethom. Ara kieku l-attakki kienu dwar il-politika tiegħu u dak li huma se jagħ­mlu biex ikunu aħjar, hekk kont nifhem, iżda li tattakka personali ma nifhimha qatt. F’Malta qed isir hekk eżatt. Din il-ġimgħa smajt lill-Prim Ministru jgħid li l-problema mhix Franco Debono iżda Joe Muscat, anzi lill-ġurna­listi qalilhom “intom tistaqsuni dwar Franco u jien nis­taqsikom dwar Joe Muscat”. Ħakkejt ftit rasi meta smajt dan il-kliem. Ma nistax nifhem kif il-PM qed jitkellem hekk. Ma jistax ikompli jitfa’ t-trab taħt it-tapit qisu mhu qed jigri xejn. Ma jistax juri mod u jagħmel ieħor. Minn PM nistennew direzzjoni u mhux devjar.

Illum jiġi u jmur iżda għada filgħodu se terġa’ tqum il-mistoqsija meta se ssir din l-imbierka elezzjoni? Id-data biss tista toħroġ dan il-pajjiż mil-limbu li waqa’ fih. Nis­pera li l-PM jifhem li ż-żmien tal-logħob spiċċa u issa wasal iż-żmien tas-serjetà.