2/4/2010

Tony Zarb

Secretary General

Print

Il-proposta li ħarġet biha l-GWU l-ġimgħa l-oħra, dik li l-Pulizija, s-suldati u l-Membri tal-Protezzjoni Ċivili, kif ukoll ħaddiema li jaħdmu f’korpi dixxiplinarji, eżempju l-Gwardjani tal-Ħabs, jingħataw id-dritt li jissieħbu f’unjin, ġiet milqugħa tajjeb ħafna minn diversi membri tal-korpi dixxiplinarji. Dan ħareġ fiċ-ċar meta aħna l-uffiċjali tal-GWU kellna ħafna messaġġi pożittivi, kemm permezz ta’ telefonati, imejls u SMSs u anki kien hemm min bagħtilna ittri biex jifirħulna għall-proposti li għamilna u wrew il-gratitudni tagħhom għal dak li għamilna bħala GWU.

Bħala GWU nħossu li dawn il-persuni li jaħdmu f’xi korp dixxiplinarju huma ħaddiema daqs l-oħrajn u għaldaqstant, għandu jkollhom id-dritt li jissieħbu f’unjin. Dan id-dritt joħroġ mill-istess Kostituzzjoni u għaldaqstant, m’għandux jiġi mċaħħad. Tajjeb li wieħed jinnota wkoll li anki f’ħafna pajjiżi tal-Unjoni Ewropea dan id-dritt huwa wieħed awtomatiku. Allura wieħed jistaqsi għaliex f’Malta le, meta niftaħru tant li aħna nagħmlu parti mill-Unjoni Ewropea.

Is-seminar li sar mill-GWU, permezz tal-Fondazzjoni Reggie Miller (il-Fondazzjoni Edukattiva tal-GWU) kien seminar ta’ interess kbir u proprju waqt dan is-seminar li tħabbar li l-Partit Laburista jaqbel li l-ħaddiema li jaħdmu f’korpi dixxiplinarji għandhom jingħataw id-dritt li jissieħbu f’unjin.

Dan ifisser li, jekk dan se jiġi diskuss fil-Parlament, l-Oppożizzjoni se tkun favur. Issa jmiss lill-Gvern li jiddikjara li anki hu jaqbel li jagħti d-dritt ta’ sħubija f’unjin lill-ħaddiema li jaħdmu f’korpi dixxiplinarji u meta dan isir, ma jkun hemm l-ebda diffikultà li l-kwistjoni tiġi diskussa fil-Parlament u tinbidel il-liġi u tagħti d-dritt ta’ sħubija fl-unjin lil dawn il-ħaddiema. Sintendi wieħed jifhem li għandu jkun hemm ċertu regolamenti speċifiċi u dan għall-interess tas-sigurtà tal-pajjiż.

Bħala GWU nistgħu noffru ħafna lil dawn il-ħaddiema mhux biss lilhom bħala ħaddiema iżda wkoll lill-familji tagħhom li anki dawn jistgħu jiggwadanjaw mill-GWU.

Il-GWU tista’ tkun ta’ servizz għal dawn il-ħaddiema mhux biss fuq livell nazzjonali iżda wkoll fuq livell internazzjonali, speċjalment fuq livell Ewropew.

Għaldaqstant, minn hawn nappella lill-Pulizija, lis-suldati, lill-Membri tal-Protezzjoni Ċivili, lill-Gwardjani tal-Ħabs u dawk kollha li jaħdmu f’xi korp dixxiplinarju biex ma joqogħdux lura u jersqu lejn il-GWU biex bħala unjin in-kunu ta’ servizz għalihom ukoll.



Messaġġ

Il-messaġġ tagħna llum imur lejn il-Gvern u nappellaw biex jitkellem mal-ħad- diema u ma’ min iħaddem biex jiġi konxju mill-problemi kbar li kulħadd se jħabbat wiċċu magħhom minħabba ż-żieda tat-tariffi tad-dawl u tal-ilma li se jkunu ta’ detriment negattiv fuq kulħadd.