|
2/15/2010
|
|
Geitu Mercieca
|
|
Dep. Sec. General - Admin & Sections
|
 Print
|
Meta
ġejt biex nikteb dan l-artiklu kelli ġlieda miegħi nnifsi, għax naf kemm hi
iebsa l-ħajja ta’ min bħalna jieħu x-xoghol trejdunjunistiku b’mod
professjonali. Bħala GWU, biex kemm jista’ jkun nassiguraw l-impjiegi
tal-ħaddiema li jaħdmu magħna, bilfors kellna nidħlu anki
f’servizzi/attivitajiet kummerċjali li jirrendu profitti.
Dan biex inkunu f’pożizzjoni li nħallsu l-pagi u noffru kundizzjonijiet oħra
tajba lill-ħaddiema impjegati kemm fil-GWU kif ukoll fis-sussidjarji tagħha.
Personalment, għax dejjem ħassejt li hemm konflitt, dejjem kont favur li
x-xogħol trejdunjunistiku u dak maniġerjali fl-istess union għandhom b’mod professjonali
u li jagħmel sens ikunu separati. Iżda prassi ta’ ’l fuq minn erbgħin sena mhux
la kemm tibdilha, aktar u aktar f’ċirkostanzi ħafna aktar diffiċli milli qatt
wieħed seta’ jsib biex ikun attwat ċertu tibdil.
L-impjieg, jew aħjar karriera – f’każ tal-uffiċjali eletti –f’organizzazzjoni
trejdunjunistika bħall-GWU, teħtieġ sagrifiċċji kbar kemm minn hekk personali
kif ukoll mill-familja u anki mill-ħbieb li jkollok. Dan xogħol li jekk ma
tiddedikax ħafna ħin u enerġija għalih, aħjar ma tidħol xejn għalih mill-ewwel.
Dan mhux impjieg bħall-oħrajn, jiġifieri b’ħinijiet fissi, iżda servizz ta’ 24
siegħa.
Barra minn hekk, huwa xogħol intensiv, dinamiku u li jirrikjedi bosta enerġija
u konċentrazzjoni. Għax ngħidha kif inhi, l-uffiċjali tal-union ikunu qiegħdin
jiddiskutu fuq impjiegi u kundizzjonijiet tax-xogħol li mhux la kemm
tikkonvinċi lil dawk li tirrappreżenta biex jaċċettaw dak li jġibulhom.
Ix-xogħol trejdunjunistiku b’xi mod jirnexxilu jorbtok miegħu.
Dan sakemm int tibqa’ temmen li dak li qiegħda tagħmel qiegħda tagħmlu għax taf
li hemm ħaddiema li ma jafux id-drittijiet tagħhom, hemm ħaddiema li għandhom
bżonn gwida, hemm oħrajn li qiegħdin ikunu żgwidati, kif ukoll hemm dawk
l-employers li ma jiddejqu xejn li mal-ewwel opportunità japprofittaw irwieħhom
mill-ħaddiema ta’ taħthom.
Id-diffikultajiet varji fuq il-postijiet tax-xogħol huma dejjem frekwenti, anki
meta d-dinja tax-xogħol tkun għaddejja fl-aqwa tagħha, aħseb u ara meta tkun
għaddejja minn perjodu diffiċli bħalma qiegħdin ngħaddu f’dawn iż-żminijiet.
Ħafna jgħidulna li ma jridux ikunu fiż-żarbun tagħna għax dejjem naqilgħuha,
għax mhux pożizzjoni li tikkuntenta lil kulħadd.
Bħalma dejjem insostni, il-GWU hija organizzazzjoni kbira, hija istituzzjoni
nazzjonali bi storja li tiżboq kull organizzazzjoni oħra fil-pajjiż u li biex
setgħet tikber hekk kellha ma’ kull żmien matul is-snin tagħha, tkun leħen
attiv b’kull mod biex twassal dak li jkun qed iweġġa’ l-ħaddiem u l-familja
tiegħu. Twassal il-leħen tal-ħaddiem attiv jew tal-ħaddiem li jinsab mingħajr
impjieg, iżda li xorta milqut mill-inġustizzja ta’ kif qed isir it-tqassim
tal-ġid li l-pajjiż ikun qed jipproduċi.
Trid tibqa’ tħares u tipproteġi l-ħaddiem irtirat, għax kien grazzi għalih li
l-pajjiż stagħna u mexa ’l quddiem. Mhux aċċettabbli li għax illum dan m’għadux
b’saħħtu li jista’ jieqaf lill-istat, illum ikun maltrattat wara dawk is-snin
twal jikkontribwixxi għall-pajjiż. Għall-GWU mhux sew li l-anzjan issa jrid
iħallas għan-nuqqasijiet ta’ ħaddiehor li huwa irresponsabbli.
Għalhekk trid tkun il-GWU bil-mezzi kollha tagħha li tibqa’ tagħti wens lil
kull klassi ta’ ħaddiema kemm jekk qiegħdin fis-saff ta’ faqar jew fil-klassi
l-iktar baxxa, kif ukoll dawk li llum telgħu fil-klassi medja. Meta twaqqfet
il-GWU din inħolqot bil-għan li torganizza lill-ħaddiema minn kull settur, biex
iġib lil kulhadd miri komuni bħalma huma kundizzjonijiet tax-xogħol aħjar.
Illum meta wieħed iħares lura, faċli jgħid li l-GWU setgħet għamlet aktar jew
użat il-mezzi li kellha b’mod aħjar. Iżda f’kull żmien iċ-ċirkostanzi jkunu
differenti milli wieħed jarahom illum u dan l-aspett jagħmel differenza sħiħa
fil-ħsieb u fid-deċiżjoni li aħna bħala individwi konna nieħdu fiż-żminijiet
differenti minn tal-lum. Jekk toqgħod taħseb, il-ħaddiem Malti mexa b’passi ta’
ġgant minn meta nġabar u twennes taħt il-ħarsien tal-GWU.
Mit-twelid tagħha l-GWU stinkat biex lill-ħaddiem tħarislu u ġġiblu l-aħjar
kundizzjonijiet u pagi biex illum ulied il-ħaddiema setgħu jilħqu tobba,
avukati, għalliema, maniġers, bankiera u nista’ nibqa’ nsemmi kull settur
tax-xogħol li wlied il-ħaddiema qiegħdin fih.
Huwa fatt li jkun hawn min l-istejjer li jaqra fil-ġurnali tal-GWU, speċjalment
dawk li jolqtu l-ħaddiema jew pos-tijiet tax-xogħol, jipprova japprofitta minn
dak li jinkiteb għall-għanijiet personali tie-għu jew tal-organizzazzjoni li
jieħdu ħsieb, għax l-għan aħħari jkun li jagħmel ħsara lill-GWU. Rapport
fil-ġurnali bħall-Orizzont jew it-TORĊA fuq deċiżjoni li se jinġieb
investiment, anki jekk dan se joħloq impjiegi ġodda, iżda li jista’ jolqot
industrija eżistenti u telfien ta’ impjiegi, ikollok min iqisu bħala appoġġ
mill-GWU biex il-ħaddiema jitkeċċew mill-impjieg.
Huwa fatt magħruf li l-ġurnali l-Orizzont u t-TORĊA meta bdew ikunu stampati,
l-iskop ewlieni kien, li jkun hemm leħen b’messaġġ nazzjonali tal-GWU. Illum
il-fatti juruna li l-poplu jrid ħafna aktar varjazzjoni milli jisma’ biss fuq
il-ħidma trejdunjunistiku u l-politika tal-pajjiż. Fil-fatt il-ġurnali tal-GWU
kellhom jimxu maż-żminijiet biex illum jinfurmaw dwar dak li jrid jisma’
l-poplu ġenerali, b’aktar aħbarijiet internazzjonali u lokali imma mhux wisq
fuq il-ħidma trejdununistiku.
Ikolli nammetti li mhux kulħadd jemmen li l-ġurnali li jkunu stampati fl-Union
Print huma mmexxija indipendentament u mhumiex taħt il-kontroll dirett
tal-union. Ċertament, li bħala Istituzzjoni Nazzjonali l-GWU trid tkompli
jkollha riżorsi b’saħħithom biex tkompli tagħti servizz fl-interess
tal-ħaddiema, il-pensjonanti, iż-żgħażagħ u l-familji tagħhom, u b’kull mod
hekk se tibqa’ tagħmel.
Il-mewġ li kontinwament tħabbat wiċċha miegħu minn kull naħa ma jaqtgħalhiex
qalbha għax il-GWU dejjem kienet baħri tajjeb li tiffaċċja kull maltemp, qawwi
kemm ikun qawwi l-baħar! Hekk se tkompli tagħmel fiż-żmien li ġej.