2/22/2010

Geitu Mercieca

Print

HUMA għadd ta’ fatturi flimkien li jġegħluni nkompli nemfasizza fuq li huma ħafna, dawk il-familji li qiegħdin jispiċċaw b’livell ta’ għajxien baxx u li hemm ċans għalihom li dan ikompli jinżel. Jekk naraw kif it-tmexxija ta’ dan il-gvern ‘Kristjan’ li l-pajjiż għandu, u kif din qiegħda tinjora r-ruħ soċjali li suppost tħaddan u, anzi, qiegħda tiddeċiedi b’mod, li tinjora d-diffikultajiet li fihom qiegħdin jispiċċaw għadd ta’ familji, allura ngħid li huwa aktar minn biżżejjed biex tispjega dak li qiegħdin iġarrbu.

Bosta deċiżjonijiet, b’mod partikolari fejn jidħlu l-fi-nanzi, li ttieħdu biex il-gvern jipprova suppost jillapazza s-sitwazzjoni ekonomika tal-pajjiż, komplew tefgħu eluf ta’ nies taħt jew viċin ħafna l-linja tal-faqar. Dan filwaqt li oħrajn kellhom jieħdu miżuri estremi fuq l-istil ta’ ħajja li kienu jgħixu.

Meta ngħid hekk, mhux qed infisser li l-familji qabel kienu jaħlu u issa m’għadhomx, iżda li qabel kienu jirsistu biex jgħixu komdi u issa dan m’għadux possibbli. Anzi llum, qed ikollhom jibqgħu lura wkoll minn affarijiet u servizzi essenzjali. Ħafna huma l-ħaddiema li qed ikollhom jaċċettaw kollox biex jaħdmu. Xi ħaġa li żgur qatt ma stennew li se jkollhom jgħaddu minnha issa, li aħna membri tal-Unjoni Ewropea.

Ma’ kull min titkellem isemmilek id-diffikultajiet li fil-mument qed ikollu jgħix bihom hu u l-familja. Iżda żgur li għall-ħaddiem l-aktar ħaġa serja hija li għandu gvern maqtugħ mir-realtà. Gvern li għandu Prim Ministru li jieħu gost jivvota bil-qalb favur dak li l-aktar li jweġġa’ lill-poplu. Aktar ma l-poplu jurih li qiegħed iweġġa’; aktar il-gvern jieħu gost jirfes u jgħaffeġ fuq il-feriti li għamillu hu stess. Huma ħafna l-ġrajjiet ta’ sof-ferenzi li l-poplu qed imiss b’idejh aktar minn qatt qabel minħabba l-infiq u ħela bla rażan mill-gvern.

Biżżejjed insemmu l-isptar li sewa mijiet ta’ miljuni mit-taxxi tal-poplu, iżda li fi żmien ferm qasir diġà mhux jaqdi l-bżonnijiet tal-poplu. U dan ġej minn, pereżempju, nuqqas ta’ sodod, li qiegħdin iħallu pazjenti minsija fuq stretchers fil-kuriduri – dik dinjità!! Falliment komplet; anki fejn jidħlu r-riżorsi umani li hemm bżonn. In-nuqqas ta’ riżorsi umani professjonali mhux xi ħaġa li ġiet fuqna għall-għarrieda, iżda xi ħaġa li l-gvernijiet nazzjonalisti ma ħasbux għaliha.

Forsi dan għamluh bi skop, għax il-politika tagħhom dejjem kienet li l-poplu ma jinqediex mis-servizz pubbliku, biex hekk ma jkollux għażla oħra għajr li jinqeda fil-privat, fejn ikollu jħallas għall-kura. “Xejn mhu b’xejn” dejjem kienet l-għajta ta’ dan il-gvern. Taħt dan is-slogan dawk li ma jkollhomx jibqgħu jittewbu. Ir-riforma fis-saħħa hija l-bidu tat-triq biex il-poplu jkollu jibda jħallas għall-kura. Xi ħaġa oħra tal-mistħija hi fejn tidħol il-mediċina li wieħed ikollu bżonn.

Biżżejjed ngħidu li min-ħabba cartel ‘uffiċjali’ li jeżisti f’pajjiżna, il-pazjenti, speċjalment il-pensjonanti li għandhom bżonn il-mediċina, f’pajjiżna jridu jħallsu anki sa tliet darbiet ogħla milli kieku jixtru din il-medicina minn pajjiżi oħra fl-Unjoni Ewropea. Anki mediċina li suppost il-marid jeħodha mill-isptar b’xejn, isib li jispiċċa jkollu jmur jixtriha, għax il-gvern mhux jaħżen.

Ma nistax ma nfakkarx li fi żmien, l-anzjani tagħna tant kienu komdi bil-pensjoni li mhux l-ewwel darba li per-mezz tagħha anki setgħu jgħinu lil uliedhom. Illum ħafna minnhom jixtiequ jig-dmu minkbejhom u jerġgħu jmorru f’dawk iż-żminijiet, għax ħafna kienu l-bżonnijiet li f’dak il-perjodu ma kinux iħallsu għalihom. Il-pensjonanti tagħna qiegħdin jispiċċaw jiftaqru, reġgħu ġew għaż-żminijiet meta missirijiethom kien ikollhom jittallbu biex jieklu.

‘Il-melħ fuq il-ferita’, kif jgħidu, kienu ż-żidiet fit-tariffi tad-dawl u l-ilma mħabbra ftit tal-ġimgħat ilu mill-Prim Ministru. Żieda li tat daqqa kbira ’l isfel lil ħafna familji. Fil-fatt, din mhix xi ħaġa li l-poplu se jirkupra minnha kif ġieb u laħaq. Is-sitwazzjoni ta’ dawk li diġà huma mgħobbija se tkompli tiggrava, meta jibdew jirċievu l-kontijiet bir-rati l-ġodda.

Aktar ħażina se tkun għal dawk li għax ma jkollhomx minfejn, u jħallsu tard, allura issa dawn se jibdew jintlaqtu bit-taxxa imposta ta’ 6% fuq il-kont, u dan kollu bil-barka tal-gvern fuq il-kontinjiet. Fuq kontijiet li l-qari tagħhom ikun għadu stima, biex hekk il-gvern ikun ċert li jista’ jisloħ kemm jista’ minn fuq il-familji, jistgħu jew ma jistgħux iħallsu. Ara lil dawk l-uħud li mingħandhom il-Korporazzjoni Enemalta għandha tieħu eluf kbar, il-kumpanija ġdida ARMS Ltd. mhijiex qiegħda tintaxxahom aktar, anzi bi ftehim tħallihom iħallsu fuq perjodi twal ta’ xhur.

Iżda għall-kuntrarju d-daq-qiet fuq il-ħaddiema u l-familji huma kbar, iżda l-prijorità tal-gvern preżenti mhux li jgħinhom, anzi hi biss kif se jkompli jisloħ iż-żgħir u lill-klassi medja. Huma dawk biss li huma komdi u mhux jintlaqtu mid-deċiżjonijiet irresponsabbli tal-gvern li ma jgergrux, infatti jkomplu jappoġġjaw lil dan il-gvern ‘Kristjan’, li l-karità tiegħu lejn il-batut hi li jkompli jitfagħlu l-piżijiet.

Il-poplu Malti hu wieħed mill-aktar li hu mgħobbi b’piżijiet u ntaxxat fl-UE. Piżijiet kbar li ġejjin mit-tariffi għolja tad-dawl u l-ilma, tariffi li huma l-aktar għolja milli qatt kienu. Fl-istess waqt għandna poplu nkwetat mit-theddid għall-impjiegi, minn nuqqas ta’ dħul finanzjarju, aktar xogħol prekarju, kif ukoll l-iskarsezzi ta’ mediċina fl-isptar u prezzijiet eseġerati mill-ispiżeriji.

Ċertament li d-dwejjaq tal-poplu issa laħaq limitu bla qies u għalhekk żgur li issa hu l-mument li fih il-poplu flimkien mal-Għaqda tal-Unions Maltin, Partiti Politiċi, Membri Parlamentari, għaqdiet non-governattivi u oħrajn għandhom iwasslu messaġġ lil dan il-gvern ‘bla kuxjenza soċjali’. Il-messaġġ għandu jkun lill-gvern biex dan ibiddel ir-rotta li qabad u jneħħi l-arroganza tiegħu billi jisma’ x’inhu jgħid il-poplu.

Hu dmir sagrosant li l-mem-bri parlamentari, speċjalment dawk fin-naħa tal-gvern, eletti fl-interess tal-votanti li jtellgħuhom, li juru huma wkoll li mhumiex se jaċċettaw li jkunu ntaxxati minħabba mismanagment tal-Enemalta u li l-poplu m’għandux jibqa’ jbati. Għalhekk, il-mani-festazzjoni tat-28 ta’ Frar... Manifestazzjoni li se ssir biex il-poplu jkollu opportunità leġittima jsemma’ leħnu fuq il-weġgħat li sallum il-gvern qed jinjora, minkejja li m’għandux awtorità morali li jkompli jmexxih.