Articles

Is-siegħa waslet!

2/25/2010
Tony Zarb
Secretary General
Print


 

Nhar il-Ħadd li ġej fit-3.30 p.m. fil-Belt hi s-siegħa tal-poplu, fejn il-poplu se jkollu l-opportunità li jsemma leħnu.

Din se tkun is-siegħa tal-prova għall-poplu. Dawk kollha li jinsabu imweġġgħin b’dak li qiegħed jiġri fil-pajjiż, speċjalment bit-tariffi tad-dawl u l-ilma, nhar il-Ħadd li ġej, posthom hu l-Belt.

Issa wasal iż-żmien li l-poplu jibgħat messaġġ ċar lill-Gvern, li ma jistax jaċċetta aktar sitwaz­zjoni fejn il-Gvern jibqa’ għaddej minn fuq il-poplu u għall-Gvern qisu mhu qiegħed jiġri xejn. Nhar il-Ħadd fil-Belt se jkun il-poplu li jsemma leħnu u se jkun ta’ għajb għall-Gvern, jekk mhux se jisma l-għajta tal-poplu. Il-poplu jinsab muġugħ u għalhekk hemm bżonn li l-poplu jiġi meħlus minn dan l-uġiegħ.

Bħala Għaqda Unjins Maltin, li din l-għaqda hi magħmulha mill-G.W.U. u l-Forum, qegħdin norganizzaw din il-protesta nazzjonali għax inħossu l-polz tal-poplu speċjalment tal-ħaddiema, pensjonanti u l-familji tagħhom. Aħna nafu minn xiex għaddej il-ħaddiem. Aħna nafu minn xiex għaddej il-poplu. Aħna bhala unjin responsabbli m’għamilniex bħal unjins oħ­rajn, li meta qegħdin jaraw li l-poplu jbati telgħu fil-gallarija.

Mhux biss qagħdu gallarija imma saħansitra qegħdin jiġu wżati bħala forċina mill-Gvern Nazzjonalista biex jagħmlu ħsara lill-Protesta Nazzjonali. Lil dawn il-unjins jew aħjar lil dawn l-uffiċjali tal-unjins ngħidu­lhom li l-ħaddiema li huma jirrapreżentaw qegħdin ibatu huma wkoll.

Iżda hu ta’ sodisfazzjon għalina, li l-ħaddiema li huma rappreżentati mill-unjins li baqgħu fil-gallerija qegħdin jitkellmu magħna u jgħidulna li nhar il-Ħadd huma flimkien mal-familji tagħhom se jattendu għal din il-protesta.

Dawn il-ħaddiema wrew id-diżap­pro­vazzjoni tagħhom għal mod kif il-unjins li jir­rappreżentawhom abdikaw mir-res­ponsabi­li-tà.

Hawn tajjeb li nsemmu wkoll lis-Sur Paul Abela, il-President tal-GRTU, meta biex joġgħob lill-Gvern tiegħu, għoġbu jqabbel il-protesta ma’ “purċinellata”.

Lis-Sur Abela ngħidulu li dak li qegħdin nagħmlu bħala unjins qegħdin nagħmluh anke għall-ġid tal-membri tiegħu, għax jekk il-poplu ma jkollux x’jonfoq, il-membri tas-Sur Abela se jbatu wkoll. Missek tistħi Sur Abela u tkomplix tkun forċina għall-Gvern tiegħek. Ikun aħjar għalik li ġġib l-interes­si tal-membri tiegħek u mhux tħalli l-passjoni u l-politika tiegħek tiġri bik.

Minkejja kull tfixkil li qiegħed ikollna, aħna persważi li nhar il-Ħadd il-poplu se jwieġeb bi ħġaru u m’huwa se jħalli lil ħadd jintimidah. Iva, nhar il-Ħadd il-poplu se jagħmel il-kuraġġ u jattendi għall-protesta.

L-appell tagħna hu lejn il-poplu u ngħid l-istess poplu biex iqum u juri li f’Malta is-saħħa tal-poplu ma jista’ għaliha ħadd. Nuru wkoll li l-poplu hu determinat li jibqa’ għaddej bil-protesta tiegħu.



Messagg

Niltaqgħu nhar il-Ħadd fit-3.30 p.m. il-Belt
<February 2012>
SunMonTueWedThuFriSat
2930311234
567891011
12131415161718
19202122232425
26272829123
45678910

Workers' Memorial Building, South Street, Valletta - VLT 11 Telephone : MALTA (+356) 25679200
© 2009 General Workers' Union | All rights reserved.
Copyright | Disclaimer | Privacy Policy