3/6/2010

Geitu Mercieca

Dep. Sec. General - Admin & Sections

Print

Jghidu li l-ispiżjar milli jkollu jagħtik. Gejtu Vella tal-UĦM jippretendi li apparti d-dritt tiegħu jekk jaqbilx jew le iżda għandu xi dritt li jindaħal x’jagħmlu unjins oħrajn ukoll. Jekk dawn ma jagħmlux kif jgħid hu joħroġ jattakka u jfixkel ix-xogħol ta’ unjins oħrajn. Dan dejjem jagħmlu imma biss skont il-Gvern tal-ġurnata. Ħaseb li l-poplu għandu memorja qasira u jista’ jitmejjel bih billi jikxef sidru u jgħid li hu xi indipendenti u ma jdaħħalx politika meta jagħmel hekk.

Hemm il-gazzetti u l-filmati li jikxfuk Sur Gejtu Vella tal-UĦM. Dan Gejtu Vella tal-UĦM għandu manija u fissazzjoni li kull meta jitkellem jew jikteb xi ħaġa jrid jattakka l-GWU. U bir-raġun għax il-GWU mibnija fuq sisien sodi u ta’ principji li akkost ta’ kollox għaliha l-ewwel il-ħaddiem u l-familja tiegħu.

Aħna nafu li Gejtu Vella tal-UĦM għandu problema għax bħala unjin mhux kapaċi li tagħmel l-aħjar għall-ħaddiema għax l-aktar li tasal l-unjin li jmexxi hu li taċċetta dak kollu li jkun irid il-maniġment mingħajr l-approvazzjoni tal-ħaddiema.

Nafu Wkoll li dan Gejtu Vella, Mexxej tal-UĦM, jasal li jagħmel minn kollox ma’ Ministru biex jitneħħa ħaddiem minn postu kontra r-rieda tiegħu għax dan il-ħaddiem kien qed jaqdi id-dmirijiet kif suppost u kif kien obbligat li jagħmel.

L-aqwa li Gejtu Vella tal-UĦM jiftaħar li hu difensur tas-sewwa. Dan Gejtu Vella tal-UĦM imexxi unjin li għall-pubbliku titkellem kontra li l-‘employers’ idaħħlu ħaddiema b’sistema ta’ ‘self-employed’ imbagħad isib li dejjem aċċettat li tħalli maniġment jimpjega ħaddiema taħt kundizzjonijiet ta’ ‘self-employed’ bħal m’għamlet biex insemmi post tax-xogħol wieħed, meta kellha r-rappreżentanza tal-ħaddiema tal-Maltapost. Mhux ta’ b’xejn li l-ħaddiema tal-privat mhux jafdawhom.

Ħafna huma l-esperjenzi tal-ħaddiema membri tal-UĦM li qegħdin jindunaw u jitgħallmu għas-spejjeż tagħhom stess kif jiġu milgħubin. Biżżejjed il-ħaddiema jħarsu lejn xi ftehim kollettiv li tiffirma għalihom il-UĦM biex jaraw jekk ikunx ftehim ixaqleb naħa waħda lejn il-maniġment.

Dan l-aħħar qegħdin naqraw spiss, stqarrijiet mill-UĦM minħabba fatt li s-salarju ta’ ħaddiema tal-Gvern fi skala 18 ma ngħatawx l-għoli tal-ħajja li ġie mogħti fil-bagit għal din is-sena.

L-ipokrezija ta’ dan hi li din l-unjin taf li ħames snin ilu kienet iffirmat il-ftehim tal-Gvern b’din il-kundizzjoni. Iżda issa għaliex stembħet u wasal li jiġi revedut il-ftehim kollettiv taparsi bħas-soltu tilagħab għall-gallerija.

Dan hu ftit mil-qerq li taġixxi bih il-UĦM u taħseb li tista’ tibqa’ tidher li hi xi difensur kbir tal-ħaddiema.

Jekk wieħed ifittex fil-gazzetti u naraw x’qal Gejtu Vella fuq it-talba li kienet saret f’Diċembru, 2009, biex jiltaqa’ l-MCESD fuq it-tariffi qabel dawn jidħlu fis-seħħ, issib li minflok fittex biex jipproteġi l-interessi tal-membri aktar kien jinteressah li dan ma jiltaqax u b’hekk il-Gvern jibqa’ għaddej bir-rieda tiegħu li jmur kontra dak li jrid il-poplu.

L-argumenti li nisimgħu mingħand is-Sur Gejtu Vella tal-UĦM mhux li jikkundanna l-Gvern li ma ħasibx biżżejjed f’dawn l-aħħar 20 sena biex ineħħi l-ineffiċjenza li konsegwenza tagħhom issa jrid ibati għalihom il-poplu, iżda biss li la ż-żejt għola m’hemmx triq oħra ħlief li l-poplu jħallas.

Għal dan Gejtu Vella, Mexxej tal-UĦM, issa hu tajjeb u aċċettabbli, għax fis-sena 1998 ma kienx, li nħallsu dawk il-kontijiet li qegħdin nirċievu kemm tal-arloġġ kif ukoll tad-drenaġġ xi ħaġa li m’għandha x’taqsam xejn mal-prezz taż-żejt.

Dan ifisser li anki jekk ma taħlix, xorta dawk il-pensjonanti, dawk il-familji li jgħixu bil-paga minima jridu jħallsu għal dawn is-servizzi milli għall-użu tad-dawl u tal-ilma. Jgħidilna Gejtu Vella tal-UĦM li dejjem ikun fuq quddiem biex jattakka l-unjins l-oħrajn mingħajr ebda provokazzjoni ħlief li dawn għandhom dritt jiddeċiedu għalihom u ma jkunu forċina tal-ebda Gvern jekk dan hux gideb.

Jista’ jkun hemm xi dubju minn dak li naqraw, naraw u nisimgħu li l-UĦM mhux fergħa tal-Partit Nazzjonalista meta tara li Gejtu Vella tal-UĦM kontinwament jidher fil-midja tal-PN, imur jitkellem taħt it-tinda jiddefendi politika tal-PN, jiftiehem ma’ Ministru tal-Gvern kontra ħaddiem u għal darb’oħra issa aktar jiddefendi lill-Gvern fuq miżuri li jgħaffġu l-familji milli lil dawk il-membri u l-familji tagħhom li jippartjenu l-unjin tiegħu.

Jiġi żmien li nfakkruh għal dak li qiegħed illum jiddefendi bħalma llum infakkruh meta l-unjin tiegħu talbet żieda ta’ €25 fil-ġimgħa u kien ġie jaqa’ u jqum milli jitkissru l-industriji, jieqaf l-investiment u jintilfu l-impjiegi.

Jew meta Gejtu Vella tal-UĦM għalaq il-Freeport bil-kontejners. Imma li dan qatt ma sar fi żmien il-Gvern attwali tgħid kumbinazzjoni Sur Gejtu Vella tal-UĦM li tgħid li ma titkellimnx u ma daħħalx il-politika.

Sur Gejtu Vella tal-UĦM jekk xbajt tagħti servizz fit-trejdunjoniżmu itlaq u tibqax tkun magħruf għall-firda li ta’ kull darba toħloq fil-moviment trejdunjonistiku.

Żgur li l-Gvern ma jħallikx mingħajr impjieg.