6/27/2010

Geitu Mercieca

Print

L-GĦAN wara d-di-rettiva li tittratta fuq l-informazzjoni u l-konsultazzjoni huwa wieħed vast. Iżda grazzi għal din id-direttiva d-djalogu soċjali ssaħħaħ u dak li hu fl-interess tal-ħaddiem li jkun jaf permezz tagħha għall-inqas ma jibqax moħbi. Min-naħa l-oħra, għalkemm f’pajjiżna għandna Segretarju Parlamentari speċifikament għall-konsultazzjoni pubbli-ka u l-informazzjoni, perso-nalment inħoss, li dan mhux biżżejjed.

Sfortunatament inħoss li aktar isir tpaċpiċ milli tittie-ħed azzjoni, anki b’rispett lejn dawk li jistgħu jkunu minoranza, iżda li xorta għandhom dritt li wkoll ikunu kkonsultati sew. Ngħid jiena, dan is-Segretarju Parlamentari ma jistax bħala l-persuna responsabbli min-naħa tal-gvern, li jiddeċiedi hu, fuq dak li jidhirlu li hu l-ġid komuni.

Jagħmel aktar sens u l-poplu jifhem aktar, jekk minflok joqgħod jitfa’ l-ballun f’saqajn l-Imsieħba Soċjali, meta jaf fiċ-ċert li qatt mhu se jkun hemm kunsens fuq it-talba li qegħdin jagħmlu l-Għaqdiet tal-Unions ‘FOR.UM’, biex ikollhom leħen f’isem l-eluf li jirrappreżentaw, ikun ċar u jgħid x’jaħseb hu.

Jidhirli li hija ironija kif f’mument niftaħru kemm aħna progressivi, iżda fl-istess ħin nagħmlu kull reżistenza meta jkollna l-opportunità biex nagħtu spazju biex aktar għaqdiet fil-Kunsill Malti Għall-Iżvilupp Ekonomiku (MCESD) ikollhom vuċi. Min jaf, forsi l-gvern irid jisma’ biss u jħalli f’idejn dawk li llum, għax hekk jaqblilhom, imorru kontra dak li fil-passat ma kienx tajjeb għalihom. Sa ftit ilu l-istess gvern ra l-ħtieġa li għax membri parlamentari minn tiegħu kienu qegħdin iħossuhom li mhumiex ikunu nfurmati u kkonsultati biżżejjed, dan daħħalhom aktar qrib tiegħu u b’hekk fetaħ aktar iċ-ċirku tad-dawra tiegħu.

Dak li mhux ħażin għall-membri parlamentari biex ikunu jistgħu jaqdu aħjar il-kostitwenti li jirrappreżentaw, naħseb li loġiku għandu jgħodd ukoll għall-eluf ta’ membri li huma rrappreżentati mill-unions fil-FOR.UM.

Il-GWU ma tistax ma tagħtix l-appoġġ kollu tagħha meta hija temmen li bil-FOR.UM rappreżentata fl-MCESD, il-bilanċ ikun aktar ġust u leħen il-ħaddiema jkun b’saħħtu daqs ta’ dawk li jirrappreżentaw is-sidien inkluż il-gvern, li hu l-akbar employer wara kollox. Il-gvern m’għandux juża l-MCESD biex jisma’ u ma jiddecidix għax f’din il-kwistjoni tal-FOR.UM hekk jaqbillu.

Ikolli ngħid li l-informaz-zjoni u konsultazzjoni, mhix xi ħaġa li mhijiex titwettaq kif suppost fejn jidħol il-gvern biss, anzi jekk irridu nkunu responsabbli bħala unions, għandna nkunu aħna l-ewwel li naraw li dak li nemmnu fih inwettquh mal-ħaddiema u l-imsieħba tagħna.

Ħafna drabi anki aħna bħala unions noqogħdu lura milli ninfurmaw lill-ħaddiema bil-problemi li huma fl-interess tagħhom li jkunu jafu bihom. Mhux l-ewwel darba li tħallew neqsin minn informazzjoni sensittiva, għax dak ikun il-parir, sakemm imbagħad ikun tard li jistgħu jkunu rranġati l-affarijiet. Kemm-il darba nkunu nafu li kumpanija ma tkunx sejra kif suppost, iżda minflok li nwasslu dak li jiftaħ għajnejn il-ħaddiema, aktarx li ma ngħidu xejn biex ma nidhrux koroh u nkomplu nħallu l-affarijiet għal meta naħsbu jista’ jiġi żmien aħjar.

Taħt skuża li l-ħaddiema ma jemmnux dak li ngħidu, jew anki li jduru kontrina bl-informazzjoni li nagħtuhom, nikkontradixxu dak li aħna stess nemmnu u li bi dritt nitolbu mingħand ħaddiehor. Hu aktar faċli li tikkritika lil ħaddieħor għal dak li ma jagħmilx, milli tara li anki int tkun qed twettaq dak li sup-

post hu fid-dmir li tagħmel.

L-informazzjoni hija meħtieġa u utli fil-ħin opportun, b’dan il-mod dak li jkun ikun jista’ jieħu dawk id-deċiż-jonijiet li jistgħu jagħmlulu differenza f’ħajtu. Nafu b’każi fejn ħaddiema li mingħalihom għandhom impjieg fis-sod, meta mbagħad il-kumpanija jew l-organizzazzjoni fejn ħadmu ma kinetx qiegħda fis-stat stabbli, dawn ħadu deċiżjonijiet meta fil-fatt ma jifilħux għalihom.

Ħafna kienu dawk il-ħad-diema li daħlu fid-djun ta’ eluf ta’ ewro, billi xtraw proprjetà jew karozzi, għax kienu jaqilgħu paga tajba u kienu jemmnu li kellhom moħħhom mistrieħ fl-impjieg li kellhom, biex wara li tilfu l-impjieg, għax fejn kienu jaħdmu naqsu l-ħaddiema, ġew lampa stampa.

Il-ħaddiema ma jistgħux jibqgħu jħallu lħithom f’idejn ħaddieħor u hu żball min-naħa tagħhom li ma jfittxux li jistaqsu għal drittijiethom, jaħdmu fejn jaħdmu. Mhux skuża li ma jkunux jafu x’tgħid il-liġi, aktar u aktar jekk din tkun tolqothom dirett. Min iħaddem f’kull żmien ukoll għandu r-responsabbiltà li jinforma lill-impjegati fuq il-qagħda li l-entità, l-azjenda jew l-organizzazzjoni li jkun qed imexxi, tkun għaddejja minnha, kemm jekk din tkun waħda tajba kif ukoll jekk inhi ħażina.