7/4/2010

Geitu Mercieca

Print

Kif jgħidu ‘iż-żmien ma jistenna lil ħadd’, ‘u kif!!’ ngħid jiena, meta nħares lura u nara kif gerrbu s-snin minn meta bdejt nipparteċipa fid-dinja tax-xogħol, biex illum ninsab fuq l-għatba li nirtira mix-xogħol.

B’dan f’moħħi, qiegħed wara kważi ħames snin nikteb kull nhar ta’ Ħadd fit-TORĊA, inwassal l-aħħar artiklu tiegħi lil dawk il-qarrejja li kienu jsegwu din l-opinjoni. Uħud minnhom sirt nafhom personalment għax mhux l-ewwel darba li ħeġġewni nkompli għax iħossuhom parti minn dak li nikteb. Nista’ ngħid li, fejn stajt, esprimejt permezz ta’ dawn il-kitbiet dak li veru nemmen fih u l-aktar għax matul is-snin rajt kemm hawn min għandu bżonn veru l-għajnuna.

Meta nħares lura u nġedded il-memorji għal meta bdejt naħdem, fejn qattajt l-ewwel ftit żmien mal-gvern sakemm ġie ċ-ċans u dħalt naħdem ma’ kumpanija privata li domt naħdem fiha għal mhux inqas minn 27 sena sħaħ, inħoss nostalġija qawwija. Fil-Union bnejt karriera mhux ħazin ukoll, fil-fatt ilni b’kollox uffiċjal elett għal 14-il sena.

Din tal-aħħar kienet esper-jenza li jiena dħalt għaliha meta kelli f’idejja karriera ta’ responsabbiltà fil-kumpanija privata, iżda x-xogħol fil-Union dejjem kelli ġibda għalih. Xogħol li jlaqqgħek ma’ persuni li għandhom bżonn l-għajnuna għax ma jħossuhomx komdi li jitkellmu għal drittijiethom. Għaldaqstant, meta kelli ċ-ċans ma qagħadx naħ-sibha biex nieħu r-riskju u minn mal-privat mort naħdem fil-Union, anki jekk diġà kont matur fl-età.

L-esperjenzi li għaddejt minnhom fuq il-post tax-xogħol kienu vasti li jibnuk u minn żagħżugħ b’ħafna ħeġġa u b’moħħ ir-riħ isawruk għal persuna aktar matura u responsabbli. Id-dħul u l-ħidma tiegħi fil-union kienet xi ħaġa naturali għax fis-sebgħinijiet il-partiċipazzjoni tal-ħaddiema fl-union kienet attiva u kompetittiva.

Dan jixhed il-fatt li jekk per eżempju kien ikun hemm ħtieġa ta’ rappreżentant fuq post tax-xogħol għal shop steward, dan ir-rwol kienu japplikaw għalih ħafna aktar milli kien ikun hemm meħ-tieġa, mhux bħalma jiġri llum fejn ħafna jippreferu li ma jikkommettux ruħhom. Tant kien ikun hemm interess li biss biss l-elezzjoni għal shop stewards kienet prattika komuni, biex ma nsemmix il-lobbying li kien isir.

Nista’ ngħid li l-esperjenza fil-ħidma trejdunjonistika tiegħi bħala shop-steward, delegat u membru tal-Kunsill Nazzjonali f’isem il-ħaddiema tal-post tax-xogħol fejn kont naħdem għal għad ta’ snin bnietni sewwa. Dan għaliex bdejt niffamiljarizza ruħi b’mod prattiku mal-parametri tar-relazzjonijiet industrijali u allura bdejt inkun involut ma’ uffiċjali għolja tal-union li kienu responsabbli f’dawk is-snin f’diskussjonijiet ma’ management barrani li kienu jmexxu b’tant ħila u dedikazzjoni dawn l-azjendi. Fi ftit kliem dan kollu wassalni biex ħadt il-magħmudija tan-nar fix-xogħol trejdunjunistiku.

Għalkemm kont attiv għal għexieren ta’ snin u kont f’diversi karigi responsabbli mill-ħaddiema fuq il-post tax-xogħol, kif għedt kien 14-il sena ilu li ħadt deċiżjoni li nibdel u nkompli l-karriera tiegħi fl-union. Dak inhar ikkontestajt għall-kariga ta’ Segretarju u kont elett biex ħadt taħt ir-responsabbiltà tiegħi t-tmexxija ta’ waħda mit-Taqsimiet tal-union. Taqsima li l-ħaddiema membri tagħha kienu jaħdmu f’kumpaniji fil-qasam tal-manifattura.

Kienu żminijiet li diġà kien hemm sinjali u bozoz jixgħelu li numru ta’ kumpaniji f’dan is-settur kienu qegħdin f’sitwazzjoni prekarji anki min-ħabba nuqqas ta’ inizjattivi ġodda u kompetittivi. Iżda ngħid għalija jiena dejjem kont persuna li dak li nkun responsabbli minnu ninvesti fih aktar minn mija fil-mija biex jirnexxi.

Per eżempju permezz ta’ din il-ħidma rnexxieli nkab-bar l-ammont ta’ membri msieħba f’din it-taqsima. Dan fost l-oħrajn kien frott il-fatt li l-ħaddiema raw il-ħidma intensiva li kont nagħmel flimkien ma’ uffiċ-jali oħra mit-Taqsima kif ukoll shop stewards leali, li wħud taw ħinhom mingħajr pretensjonijiet.

Il-ħidma ta’ min veru jemmen fix-xogħol trejdunjunis-tiku jaf li tinvolvi injezzjoni qawwija ta’ vokazzjoni fiha. Mill-esperjenza nista’ ngħid li llum m’għadekx issib wisq min dan ix-xogħol jieħdu bħala vokazzjoni. Ngħid għalija, is-sodisfazzjon fix-xogħol kien meta s-servizz li kont nagħti kien ikun apprezzat mhux b’xi rigal iżda minn wiċċ sodisfatt tal-persuna li tkun ġiet taqsam miegħek id-dwejjaq li tkun fihom u ħassitha kuntenta li għall-inqas smajtha u tajt kasha. Min jaf kemm-il siegħa qattajt nisma’ l-weġgħat u d-diffikultajiet ta’ ħaddieħor meta inti stess bħal kulħadd ikollok il-problemi tiegħek, iżda li f’dawk il-ħinijiet tkompli żżomm misturi fik.

Meta d-delegati fil-Kungress Nazzjonali tal-union ħames snin ilu għoġobhom jeleġġuni għall-kariga ta’ Deputat Segretarju Ġenerali, ħatruni fiha għax emmnu fil-mod ta’ tmexxija tiegħi li dak li nwiegħed inwettqu mingħajr biża’ u kantunieri. Dawn fuq dak li kien għaddej f’dawk iż-żminijiet fil-union riedu li dak li għandu jsir irid isir u ma jitħalliex għal għada. Hija fatt ukoll li l-midja għar-raġunijiet diversi tagħha tipprova tkissrek anki f’affarijiet ta’ riforma u tibdil li wieħed ikun qed jagħmel fl-interess tal-progress. Konsegwenza t’hekk tnisslet skumdità li nkunu kkritikati fuq dak li jkun qed isir internament, u dan kollu kien hemm drabi meta din is-sitwazzjoni żammet milli jittieħdu d-deċiżjonijiet neċessarji fl-interess tal-ħaddiema ġenerali u fuq kollox tal-istess organizzazzjoni.

It-tibdil fil-wiċċ tal-organizzazzjoni u r-riforma interna fil-kultura li jien irnexxieli nwettaq f’dawn l-aħħar snin għenu iżda mhux biżżejjed. Il-perjodi tiegħi fil-kariga ta’ Deputat Segretarju Ġenerali ma kienx biżżejjed biex jien stajt inkompli nibdel mill-għeruq dak li hemm ħtieġa urġenti li jitkompla. Iż-żmien tiegħi għadda u se nħalli l-ħidma tiegħi trejdunjunistika b’rasi mgħollija għax minn dak li kont naf tajtu kollu u fejn inqast lil xi ħadd nitlob maħfra.

Sinċerament nemmen li mill-ftit li kont naf bil-kontribut tiegħi rnexxieli ngħin u ngħolli l-livell ta’ għajxien ta’ ħafna ħaddiema u l-familji tagħhom u għaldaqstant dan jagħtini sodisfazzjon enormi u kuntentizza. Min-naħa tiegħi xorta se nfittex li nkompli ngħin lil dawk li jitolbu l-għajnuna tiegħi. Fl-aħħar inselli u nirringrazzja lil dawk li f’dawn is-snin appoġġjawni u niskuża, anzi naħfer, lil dawk li jħossu li għandhom jidħlu personali u jweġġgħuk b’għemilhom.



Nota editorjali: Minn hawn nixtiequ nirringrazzjaw lil Geitu Mercieca kemm għall-kontribut tiegħu f’din il-gazzetta kif ukoll għall-ħidma tiegħu fil-GWU. Nawgurawlu wkoll għall-kapitlu ġdid li qed jiftaħ f’dan il-mument importanti ta’ ħajtu.