7/22/2010

Michael Parnis

Dep. Secretary General

Print

Fl-aħħar iż-żejt tela’ f’wiċċ l-ilma! Dak li ili ngħid għal aktar minn sitt snin fl-aħħar ġie kkonfermat! Il-GRTU mhix organizzazzjoni tal-ħaddiema iżda tas-sidien. Dan ġie kkon­fermat mill-istess GRTU kif ukoll mis-Segretarju Parlamentari, l-Onor. Chris Said. Mhux għax kelli xi dubju dwar dak li kont qed ngħid tafux. Il-fatt li l-GRTU kienet qiegħda tirrap­preżen­ta lill-employers fil-Kumitat Ekonomiku u Soċjali tal-Unjoni Ewropea (KESE) hu biżżejjed biex tikkonferma dak li kont qed ngħid.

Li skantajt hu l-fatt li donn­­hom il-Malta Emplo­yers Association (MEA) skop­rew din appuntu issa. Dan jikkonferma wkoll dak li issa ilni ngħid ix-xhur li l-employers għandhom ħames rappreżentanti fl-MCESD fil­waqt li l-ħaddiema għandhom erbgħa. Matul dawn l-aħħar ġranet kellna ħaf­na żvilluppi dwar dan is-suġġett u tajjeb li wieħed jana­lizza dawn l-iżvillupi u jipprova jaqta’ x’se jkun il-pass li jmiss.

Waqt laqgħa tal-MCESD, l-Onor. Said, ħabbar il-ħa­mes nomini min-naħa ta’ Malta għall-KESE. Min-naħa tat-trejdunjins ma kien hemm ebda problema, il-GWU nnominat lili filwaqt li s-CMTU u l-UĦM innominaw lil Anna Maria Dar­manin. Dawn kienu l-uniċi nomini u għalhekk il-Gvern aċċettahom it-tnejn u reġa’ kkonfermana għall-erba’ snin li ġejjin. Min-naħa l-oħra, is-Soċ­jetà Ċivili reġgħu nnominaw lil Grace Attard li wkoll ġiet ikkonfermata mill-Gvern. Kien jonqos in-nomini tas-sidien. Tħabbar li l-Gvern għażel lil Stefano Mallia mill-Kamra tal-Kummerċ u Industriji u lil Vince Farrugia mill-GRTU. Tħalla barra r-rappreżentant tal-MEA. Bla dubju, u kif mistenni l-MEA ħaditha bil-kbir ħafna din id-deċiżjoni u wara ħafna għajjat u tisbit telqgħu l-barra mill-MCESD. Smajtu sew għe­żież qarrejja, telqu ’l barra!

Filwaqt li ngħid li naqbel totalment mal-mod kif a­ġix­xew ma nistax ma nikkummentax dwar dak li qalu fuq il-GWU meta xi xhur ilu ma dħalniex għal-laqgħa tal-MCESD. Kemm għajruna dakinhar u kemm artikli kitbu kontra l-mexxejja tal-GWU! Ir-rapport ta’ NET News kien jgħid sempliċi li l-Gvern se jiftaħ diskussjoni mal-MEA biex isib soluzzjoni. Ma nafx x’diskussjoni hi din meta din suppost ilha ssir ix-xhur. Il-verità hi li l-Gvern ilu l-ġim­għat li ħa d-deċiżjoni politika partiġġjana tiegħu u issa ma jistax imur lura minnha.

Naħseb li l-Gvern se jinħeba wara l-iskuża u jgħid li għal­hekk talab li għal kull post ikun hemm żewġ nomini u mhux waħda. Fil-każ tagħna l-ħaddiema, l-affari­jiet huma ċari. Hemm tnejn u l-Gvern jagħżel wieħed kull wieħed. Ma nistax nimmaġina l-Gvern jagħżel tnejn mill-GWU u jħalli barra s-CMTU jew kontra. Iżda fil-każ tal-employers l-affarijiet huma ftit aktar ikkomplikati.

F’dawn l-aħħar sitt snin kell­na rappreżentant kull wie­ħed mill-FOI u l-GRTU. L-MEA, il-Kamra tal-Kum­merċ (CofC) u l-Malta Hotels and Res­­taurant Association (MHRA) ma kellhomx rap­preżentant. Matul dawn l-aħħar snin il-FOI u CofC ingħaqdu flimkien u sa ċertu punt iċ-CofC kellhom xi forma ta’ rappre­żentanza. L-MHRA min-naħa tagħhom jidher li qatt ma kellhom interess li jkollhom rappreżen­tant filwaqt li l-MEA xtaqu li din id-darba jkoll­hom post huma. Jien informat li l-MEA, l-MHRA u s-CCI nno­minaw l-istess persuni filwaqt li l-GRTU waħedhom innominaw il-kanditat tagħhom. Biex l-employers jim­xu ma’ dak li qed jitlob il-Gvern allura suppost jingħata tmien nomini mill-employers, tnejn minn kull organizzazzjoni.

Imma issa il-ftira saret u għandna l-MEA rrabjata u urtata ħafna. Il-Gvern qed jipprova jsib soluzzjoni billi jiddiskuti. Soluzzjoni tista’ tkun li t-term ta’ erba’ snin jinqasam bejn l-MEA u l-GRTU u xi ħadd minn­hom ikun membru u l-ieħor sostitut taż-żewġ membri nnominati mill-employers.

Qabel ma nagħlaq għax kont se ninsa, waqt l-istess laqgħa tal-MCESD telqu ’l bar­ra wkoll l-GRTU, le le mhux il-GWU iżda l-GRTU. Issa l-Gvern jista’ jgħid li l-employers qegħdin fi żvan­taġġ għax għandhom biss tliet rappre­żentanti fl-MCESD. Dan juri biss li l-MCESD għandu bżonn jiġi rijorganizzat u jinbidel mill-għeruq. Kulma jrid il-Gvern hu naqra kuruġġ u onestà. Naħseb li ż-żewġ ingredjenti huma neqsin.



Spazju liż-żgħażagħ

Meta tara l-istatistika, ħafna drabi, din tkun maqsuma f’etajiet. Ir-raġuni hi biex tipprova tidentifika kif sezzjonijiet ta’ etajiet differenti jkunu sejrin. Jekk nieħ­du, per eżempju, l-ista­tistika tal-qgħad naraw li meta tħares lejn din, issib li l-grupp taż-żgħażagħ hu wie­ħed minn dawk l-aktar milqutin u għalhekk insibu miżuri ddisinjati partikolarment għaż-żgħażagħ.

Hemm ħafna raġunijiet għaliex nagħmlu dan. Żgur li raġuni minnhom hi li ż-żgħa­żagħ huma investiment f’din il-ġenerazzjoni u hu investiment aktar fit-tul.

Biss minkejja dan il-kliem sabiħ kollu, ħarsa madwar­na nsibu li, tista’ tgħid f’kull qasam, diffiċli li ssib xi qasam li hu mmexxi miż-żgħażagħ. Dan issibu anki f’dawk l-oqsma li hu­ma ddedikati għaż-żgħa­żagħ.

Il-mistoqsija ta’ din il-ġim­għa hi dwar dan is-suġ­ġett – suġġett li għalkemm mhux meqjus bħala kontroversjali hu importanti ħafna. Il-mistoqsija kienet tolqot il-musmar fuq rasu:



Taqbel li ż-żgħażagħ għand­hom jingħataw aktar spazju biex juru t-talen­ti tagħhom?


1. IVA, naqbel 75%

2. Le, ma naqbilx 0%


3. Xi kultant iva u xi kultant le 25%



Kummenti: L-akbar grupp kien dak li qal li jaqbel li ż-żgħażagħ għandhom jingħataw aktar spaz­ju. Kien hemm 75% li wieġbu dan. Ma kien hemm ħadd li qal li ma jaqbilx u kien hemm grupp ta’ madwar 25% li qalu li jaqblu li ż-żgħażagħ għandhom jin­għataw aktar spazju f’xi ok­każjonijiet.

Il-fatt li kien hemm 75% li qalu li jaqblu li ż-żgħażagħ għandhom jingħataw aktar spazji biex juru t-talenti tagħ­hom juri li l-maġġoranza tal-qarrejja ta’ l-orizzont jemmnu żewġ affarijiet. L-ew­wel li ż-żgħażagħ għandhom it-talenti u t-tieni li m’aħniex qegħdin nagħtu spazju lil dawn biex juru­ t-talenti li għandhom. Il-fatt li ma tantx nagħ­tu ċans liż-żgħażagħ mhux fatt pożit­tiv. Min għandu esperjenza ta’ għaq­diet, huma min huma, jara kif dawn il-gruppi jaħdmu. Il-kontroll ikun f’idejn grupp żgħir ta’ nies li ilhom fl-għaqda. Dan waħdu jpoġ­ġi lill-grupp fil-kontroll u mhux liż-żgħażagħ. Anki jekk naraw gruppi li jidenti­fikaw ruħhom iżda ma jaħ­dmux f’xi għaqda, tara li min­kejja l-piki li jkun hemm bejniethom, meta xi ħadd, speċjalment jekk ikun żagħżugħ, jidħol fil-qalba ta’ dan il-grupp isib ħajt taż-żonqor ma’ wiċċu. Jekk ikun żagħżugħ għall-ewwel ma jagħtux kasu, iżda jekk jibqa’ jinsisti tibda l-kritika li minkejja l-isforzi kollha tiegħu għadu żgħir biex ikun żviluppat u raffinat daqs l-oħrajn.

Sfortunatament ħafna żgħażagħ jaqtgħu qalbhom għax jaraw li minkejja li għandhom il-ħila, iridu jaħ­lu l-ħin jiġġieldu dawn it-tattiċi milli jużaw it-talenti tagħhom.

L-aħħar grupp li jilħaq 25% jemmen li mhux dej­jem għandna nagħtu spazju liż-żgħażagħ. Ir-raġunijiet jis­tgħu jkunu varji ħafna iżda xorta jibqa’ l-fatt li dan il-grupp xorta m’għandux fiduċja kbira fiż-żgħażagħ tagħna.

Dan il-grupp jurina li għad għandna triq mhux ħażin sakemm naslu għal żmien fejn inqisu lil kul­ħadd fuq il-ħila u t-talenti tiegħu u mhux jekk hux ra­ġel jew mara, jekk hux is­wed jew abjad, jekk hux aħ­mar jew blu, jekk hux anzjan jew żagħżugħ.

Kull min ħadem maż-żgħa­żagħ jaf l-entużjażmu, il-ħeġġa u l-potenzjal li għand­hom. Ħafna drabi kulma jkunu jridu hu ftit inkoraġġiment u spazju fejn jistgħu jaqilbu l-potenzjal li għandhom f’azzjoni. Hi ħasra li dan il-potenzjal għad hawn min jibża’ minnu!



Stharrig

Taqbel li f'pajjizna jidhol id-divorzju?

1. IVA. Naqbel

2. LE. Ma naqbilx

3. M'ghandix opinjoni



Aghzel il-preferenza tieghek u ibghat SMS bin-numri tal-preferenza 1, 2 , 3 fuq 99497426 jew e-mail fuq mparnis@gwu.org.mt jew ċempel fuq in-numru 21232119