|
8/18/2010
|
|
Tony Zarb
|
|
Secretary General
|
 Print
|
Għalkemm
ma nagħmilx parti mid-djoċesi ta’ Għawdex, nistqarr li laqtitni ferm l-ittra
pastorali mill-Isqof ta’ Għawdex Mons. Mario Grech fl-okkażjoni tal-festa ta’
Marija Mtellgħa s-Sema. Nista’ ngħid bla tlaqliq li l-ittra pastorali laqtitni
mhux bi ftit għax tinkludi suġġetti importanti li l-bniedem qiegħed jesperjenza
fiż-żminijiet tal-lum.
Fost affarijiet oħrajn, l-ittra pastorali titkellem fuq il-faqar u tfakkar li,
f’pajjiżna hawn 15% tal-popolazzjoni fir-riskju tal-faqar, xi ħaġa li bħala
unjin tkellimna dwarha. Il-pastorali ma tittrattax biss il-faqar materjali imma
tittratta wkoll forom oħrajn ta’ faqar. Il-pastorali tistaqsi: “għaliex
il-faqar?”
U tgħid “waħda mill-kawżi ta’ dan il-faqar kollu hija l-individwaliżmu li
ħolqot il-kultura kapitalista. Dan wassal biex jinfirex l-anonimat, tikber
l-indifferenza u joktor in-numru ta’ dawk li għalkemm parti mill-folla, qegħdin
jgħixu fis-solitudni”. Anke aħna bħala unjin ilna żmien twil nitkellmu dwar
l-individwaliżmu, speċjalment bejn il-ħaddiema fuq il-postijiet tax-xogħol, u
dejjem stqarrejna li, bl-individwaliżmu qiegħda tinqered is-solidarjetà.
Punt importanti li tittratta l-pastorali huwa dak tas-solidarjetà. Xi ħaġa li
hija ferm importanti għalina bħala unjin u dan għaliex il-unjin bħal kull unjin
oħra, hija mibnija fuq is-solidarjetà. L-Isqof Grech fakkar fil-kmandament
tal-imħabba li tana Ġesù u li huwa t-tweġiba għal din l-isfida tas-solidarjetà
meta fakkar li Gesù qal li “bħalma ħabbejtkom jien, hekk ukoll ħobbu intom lil
xulxin”. Din hija stqarrija ċara ħafna dwar il-ħtieġa ta’ solidarjetà bejn
il-bnedmin. U għalhekk hemm bżonn ta’ aktar solidarjetà bein il-poplu, anki
l-poplu bħala ħaddiem.
L-Isqof Mario Grech fil-pastorali stqarr li wieħed japprezza wkoll l-intervent
tal-istat u tal-imsieħba soċjali f’ċerti każijiet, biex setgħu jiġu assigurati
l-impjiegi.
Din l-istqarrija tal-Isqof Grech saret ftit tal-ġranet wara li, bis-saħħa u
bil-għaqal tal-GWU ġew salvati madwar 1,400 impjieg mill-kumpanija ST
Microelectronics. Punt ieħor fil-pastorali tal-Isqof Grech li ġie apprezzat
min-naħa tagħna tal-GWU, huwa dwar is-solidarjetà soċjali fejn qal li s-soċjetà
trid tkun solidali maż-żgħażagħ tagħna, speċjalment billi tfittex tipprovdilhom
xogħol produttiv mhux biss biex jaqilgħu l-għajxien tagħhom imma wkoll biex
jiksbu d-dinjità. Is-solidarjetà tissarraf ukoll fil-kontribut li kull ċittadin
huwa fid-dmir li jagħti fir-rispett u l-liġijiet fiskali biex il-kaxxa
tan-nazzjon tkun tista’ tipprovdi l-għajnuna lil min jinħtieġ, partikolarment
liż-żgħir.
Għalhekk tkun solidali jfisser li ma jkunx hemm evażjoni tat-taxxa, stqarr
l-Isqof Mario Grech. Tajjeb wieħed ifakkar li, permezz tas-solidarjetà jiġi
mħares il-prinċipju tal-ġustizzja soċjali. Bħala unjin ilna nsostnu l-bżonn
tas-solidarjetà soċjali u, għalhekk, naqblu ma’ dak li stqarr l-Isqof Grech.
L-Isqof Grech jagħlaq il-pastorali tiegħu proprju b’dan il-kliem: “Dan huwa
mottiv biex nifirħu flimkien u naħdmu għal soċjetà fejn is-solidarjetà tgħammar
fost il-bnedmin.”
Aħna proprju dan li rridu u ilna nistqarru li rridu soċjetà solidali mhux biss
fuq il-post tax-xogħol imma anke barra għax għalina tal-GWU nħarsu lejn
il-bniedem bħala bniedem sħiħ li jkun xprunat mill-prinċipju tas-solidarjetà u
ġustizzja soċjali.
Għalhekk nappellaw lil kulħadd, kemm lill-Maltin kif ukoll lill-Għawdxin, biex
jixtarru sew il-messaġġ ta’ solidarjetà kif espress fl-ittra pastorali
tal-Isqof ta’ Għawdex Mons. Mario Grech.
Messaġġ
Il-messaġġ tagħna llum imur lejn dawk kollha li jaħdmu fil-qasam tal-ħwienet u,
filwaqt li nawgurawlhom ħidma tajba, infakkruhom li, bħala GWU, nistgħu nagħmlu
ħafna għal dawn in-nies u nappellawlhom biex jersqu lejn il-GWU biex, bħala
unjin inkunu ta’ wens għalihom ukoll.