8/26/2010

Michael Parnis

Dep. Secretary General

Print

Matul dan is-sajf kie­nu bosta dawk li kitbu dwar l-MCESD. Assistejna għal avvenimenti, fosthom għaqda ta’ min iħad­dem li ssospendiet il-parteċipazzjoni tagħha mill-MCESD, il-pressjoni tal-FORUM biex jingħaqdu bħala membri u anke ‘private members’ bill’ imressqa mill-Onorevoli Gino Cauchi biex tinbidel il-liġi. Tista’ tgħid li dan is-sajf kien iddominat minn dan is-suġ­ġett. Riċenti l-Gvern bagħat ittra li fiha qed jagħti ħjiel li lest ibiddel il-liġi u jemenda biex jipprova jikkuntenta lill-FORUM fit-talba tagħhom biex jingħaqdu membri.

Sa ftit ġimgħat ilu l-istess Gvern kien qed jgħid li biex tinbidel il-liġi irid ikun hemm ftehim unanimu fl-MCESD. Jien kont ktibt li din hi biss skuża biex ma ssirx bidla u xejn aktar. Il-UHM ilha tgħid li mhix favur li l-FORUM jin­għaqdu bħala membri u nemmen li l-Gvern ma jixtieqx jieħu deċiżjoni li turtahom. Iżda issa naħseb li l-Gvern in­duna li din il-pożizzjoni kie­net żbaljata u qed jipprova jraqqa l-pannu bil-qara aħmar. Qed ngħid hekk għax il-proposti tal-Gvern xorta waħda jħallu żbilanċ fuq in-naħa tal-ħaddiema. Jidher li l-Gvern jixtieq idaħħal il-FORUM u magħhom jixtieq ukoll idaħħal rappreżentant mill-Industrija f’Għawdex. Jekk dan iseħħ xorta waħda jkun hemm żbilanċ fuq in-naħa tal-ħaddiema u minflok erbgħa b’ħamsa niġi ħamsa b’sit­ta.

Hemm ukoll proposta biex min għandu tnejn, inaqqas wie­ħed biex jiġu akkomodati l-FORUM. Anke hawn jin­ħo­loq żbilanċ. Il-GWU għandha żewġ siġġijiet kif għandha l-Kamra tal-Kummerċ, u jekk dawn inaqqsu wieħed kull wieħed nerġgħu niġu bi żbi­lanċ. Hawn tajjeb ta’ min isem­mi li mhux il-GWU biss għandha żewġ siġġijiet iżda anke is-CMTU. Jgħidu x’jgħi­du l-verità hi waħda u ħadd ma jista’ jgħid li qed nivvinta. Il-UĦM hi parti mis-CMTU anzi parti sew mis-CMTU, għal­hekk is-CMTU għandha is-siġġu tagħha u l-UHM li nerġa’ ngħid hi l-maġġoranza tas-CMTU għandha siġġu għa­liha wkoll. Meta twaqqfet l-MCESD il-ħsieb oriġinali kien li l-GWU u s-CMTU jkollhom żewġ siġġijiet kull wieħed iżda l-UĦM m’għoġobiex dan l-arranġament u riedet siġġu għaliha.

Minkejja dan kollu naħseb li wasal iż-żmien li l-Gvern ikun aktar kuraġġjuż u jimmira għal riforma aktar drastika. Riforma li tinkludi fiha wkoll is-Soċjetà Ċivili. Ix-xogħ­ol tal-MCESD hu wieħed purament konsultattiv. L-MCESD ma jmexxix Malta u nemmen li ħadd mill-organiz­zazzjonijiet li jagħmlu parti minnhu ma jridu hekk. L-MCESD qiegħed hemm biex jagħti pariri li Gvern fl-oqsma Ekonomiku u Soċjali.

Nirrepeti jagħti pariri u mhux jilleġisla. Jista’ xi ħadd jispjegali kif xi ħadd jista’ jieħu parir mingħandu stess. Kif jista’ l-Gvern jitlob parir lill-MCESD meta fuq l-istess MCESD il-Gvern għandu erba’ siġġijiet. Jekk il-Gvern irid verament pa­riri siewja għandu jafda f’idejn il-membri tas-soċjetà ċivili, it-trejd unjins u min iħaddem.

Dan hu dak li jsir f’diversi pajjiżi tal-UE, għalkemm mhux kollha. Dan hu dak li qiegħda tipproponi l-GWU fid-dokument tagħha dwar l-istess suġġett.

Jonqos biss il-kuraġġ min- naħa tal-Gvern u ma nibqgħux inraqqu l-pannu bil-qara aħ­mar.



Sparar u nar

Zgur li ħadd ma jista’ jiċ­ħad li dan l-aħħar snin kibret il-popolarità tal-festi f’pajjiż­na. Illum ma ssib imkien li ma jiċċelebrax xi festa.

Illum tista’ tgħid li kollha huma festi kbar. L-ewwel tib­da banda, wara jibda l-armar fit-toroq u biex ma nħallu­hiex nieqsa għal melħa, ikoll­na wkoll in-nar. Biex kol­lox jieħu dimensjoni ħafna akbar, kulma tkun trid hu li xi ħadd tiġih l-idea li jibda ban­da oħra. Hawn jibdew il-piki. Fejn ikun hemm dawn, żgur li l-aktar li jidher hu n-nar li jiġi sparat. F’ċerti rħula bħal Ħal Lija, hemm tradizzjoni qawwija tan-nar. Mhux biss nar sparat iżda wkoll tradizzjoni ta’ xogħol tan-nar. Kul­ħadd jara x’jivvinta biex joħ­loq tip ta’ nar ġdid.

Għall-ewwel konna mmorru għall-kwantità. Il-pi­ka kie­net min kien ikollu l-aktar nar u min kien ikollu l-aktar kaxxa infernali twila. Illum, l-aktar dawk il-kma­mar tan-nar li għandhom tra­dizzjoni, saru aktar sofistikati u qegħdin imorru għal kwa­lità wkoll. Il-kompetizzjoni li ssir kull sena għal-logħob tan-nar tat aktar żvoġ għal nar ta’ kwalità.

Aktar kompetizzjoni, aktar pika u aktar kmamar tan-nar għax kulħadd irid jesperimen­ta. Li tesperimenta fid-delizz­ju tiegħek hi xi ħaġa tajba għax hu b’hekk biss li timxi ’l quddiem. Iżda hemm diffe­renza kbira li tesperimenta fuq xi magna u li tesperimen­ta bin-nar. Ir-raġuni prinċipa­li hi li meta qed tesperimenta fin-nar tkun qed tilgħab b’kimiċi li jisplodu. Fuq kollox hemm differenza kbira meta għandek xi inġinier tal-kimika li qed jesperimenta fuq kimiċi li jisplodu fil-laboratorju taħt kundizzjoni­jiet stretti u kkontrollati u xi ħadd li jekk għandu, hu li­vell baxx tax-xjenza tal-kimi­ka u qed jesperimenta taħt kundizzjonijiet li mhux ik­kon­trollati.

Saru sforzi, għalkemm għal ħafna sforzi patetiċi u nofs qalb, biex jipprovaw jik­kontrollaw dan ix-xogħol biex jonqos il-periklu. Iżda għadna ’l bogħod ħafna. Ftit ilu kellna diżgrazzja oħra meta taret kamra tan-nar oħ­ra, din id-darba tal-Mosta lej­let il-festa u ntilfet il-ħajja ta’ persuna oħra. Kull meta ssir diżgrazzja bħal din, tibda dis­kussjoni fuq dan ix-xogħ­ol.

Il-mistoqsija din il-ġimgħa kienet:

Taqbel li x-xogħol tal-logħob tan-nar jinqata’ minn paj­jiż­na?

IVA naqbel – 59.2

LE Ma naqbilx – 11.8

Ikun hemm aktar kontrolli – 38.9

Kummenti: L-akbar grupp hu dak li jaqbel li x-xogħol tal-logħob tan-nar jinqata’. Kien hemm ftit inqas minn 60% li jemmnu dan. Kien hemm ftit anqas minn 30% li jemmnu li dan ix-xogħ­ol jitħalla, għandu jkun hemm aktar kontrolli. Kien hemm biss ftit aktar minn 10% li jemmnu li l-affarijiet għandhom jibqgħu kif inhuma. Tajjeb li ngħidu li dan l-ist­ħarriġ sar ftit wara li taret il-kamra tan-nar tal-Mosta. Bħal­­ma jiġri dejjem f’Malta, wara diżgrazzja jkun hemm furur, iżda wara ftit kollox jin­tesa u l-affarijiet jerġgħu lu­ra għal fejn ikunu. Sakemm terġa’ tiġri diżgrazzja oħra!

Jekk nieħdu r-riżultat insibu li hemm daqs 90% li jem­m­nu li l-affarijiet m’għand­­homx jibqgħu kif inhuma. Qegħdin jgħidu li hemm bżonn isir xi ħaġa biex nik­kon­trollaw dawn id-diżgrazz­ji. Minn dawn kien hemm madwar 60% li jemmnu li dan ix-xogħol jinqata’. Dan l-ammont kollu jista’ jkun ri­żultat għax kienet għada kemm seħħet diżgrazzja oħ­ra fejn intilfet ħajja oħra. Ir-raġuni hi għalkemm dan ix-xogħol jista’ jinqata’, in-nar fil-festi żgur li mhux se jinqata’. Għalhekk is-soluzzjoni tkun li nimportaw dan il-logħob tan-nar u l-perikli, sa ċertu punt, xorta jibqgħu hemm għax ix-xogħol irid jinħażen u jinġarr.

It-30% l-oħrajn qegħdin jgħi­du li hemm bżonn ta’ ak­tar kontrolli. Ftit snin ilu kienu saru rapporti biex ikun hemm aktar kontrolli u biex dan ix-xogħol isir fuq bażi ak­tar professjonali. Kemm im­xejna ’l quddiem ma nafx għax id-diżgrazzji f’dan il-qasam xorta għadhom hemm u xorta jsiru b’mod goff. Din id-darba d-diżgrazz­ja setgħet kienet ħafna agħar. Hu għalhekk li l-maġġoranza tan-nies urew din ix-xewqa. Li tiskanta kienet li din id-darba, l-awtoritajiet baqgħu sik­tin u ma kien hemm l-ebda kliem li se jsiru aktar kon­trolli.

Kien hemm biss 10% li jemm­nu li kollox għandu jibqa’ kif inhu. Probabbilment dawn in-nies huma mdaħħ­lin aktar f’dan ix-xogħ­ol minn ħaddieħor u jaraw li bħal kull xogħol ieħor, tagħmel x’tagħmel, il-perikli jibqgħu hemm. Kien hemm minn ħareġ bl-argument li l-ammont ta’ nies li ntilfu tul is-snin ma kienx kbir esaġerat. Il-konkluzjoni hi li m’għandniex nesaġeraw għax taret kamra tan-nar oħra.

Argument li jidher li ġie aċċettat mill-awtoritajiet għax baqgħu passivi wara l-aħħar diżgrazzja. Minn dan l-istħarriġ jidher li l-maġġo­ranza tan-nies ma jaqblux ma’ dan. Għall-maġġoranza, li ntilfet ħajja oħra, hi diż­grazz­ja li setgħet ġiet evitata u għalhekk mhux aċċettabbli.

Stharrig

Taqbel li ghandu jkun hemm kontroll fuq l-armar li jsir fil-festi?

1. Iva naqbel

2. Le ma naqbilx

3. F'certi kazi biss

Aghzel il-preferenza tieghek u ibghat SMS bin-numri tal-preferenza 1, 2 , 3 fuq 99497426 jew e-mail fuq mparnis@gwu.org.mt jew ċempel fuq in-numru 21232119