News
Il-GWU b’taħdidiet fl-interess tal-impjegati tal-Enemalta
Fid-dawl tal-fatt li l-GWU tgawdi
l-fiduċja tal-maġġoranza assoluta tal-ħaddiema tal-Enemalta, hija qiegħda
ittenni li hi biss għandha d-dritt tinnegozja f’isem il-ħaddiema f’dak li
jirrigwardja kundizzjonijiet tax-xogħol. Dan jinkludi wkoll id-diskussjonijiet
dwar ir-riforma li għaddejja bħalissa f’diversi sezzjonijiet fl-Enemalta.
Wara l-ftehem li laħqet fl-istruttura u kundizzjonijiet aħjar għall-ħaddiema li
jaħdmu fis-Sezzjoni tal-Avjazzjoni tal-Enemalta, fil-ġimgħat li ġejjin se
tkompli għaddejja b’diskussjonijiet fuq strutturi u kundizzjonijiet aħjar
għall-ħaddiema f’sezzjonijiet oħra tal-Enemalta kemm dawk fil-Power Station
tal-Marsa kif ukoll ta’ Dellimara.
Fil-preżent għaddejjin diskussjonijiet fl-interess tal-ħaddiema kemm
għas-sezzjonijiet tal-‘workshop’, tad-distribuzzjoni, tal-‘credit control’ kif
ukoll tas-sezzjoni tal-Petroleum.
Nhar it-Tnejn il-GWU se tlaqqa l-Kumitat Eżekuttiv tal-ħaddiema tal-Enemalta
biex tippjana laqgħat għall-ħaddiema fejn jiġi spjegat lilhom ix-xogħol li
l-GWU hija għaddejja bih fl-interess tagħhom. Ir-riformi u tibdil strutturali
fis-sezzjonijiet li l-management tal-Enemalta qiegħed jitlob qegħdin ikunu
diskussi kontinwament mal-GWU.
Għaldaqstant il-GWU qiegħda tiddeplora l-fatt li meta hi u t-tmexxija
tal-Enemalta qegħdin ifittxu li jsibu soluzzjonijiet għall-problemi kbar li
jeżistu, hemm minn fil-‘management’ qiegħed jgħin anki permezz ta’ unjin oħra
biex tikber il-firda fost il-ħaddiema ħalli dak li jixtieq iwettaq anki kontra
ir-rieda tal-ħaddiema jidħol bla tbattija.
Il-GWU qiegħda twissi li mhux se tħalli li dan isir għax it-tkissir u l-firda
fl-għaqda tal-ħaddiema jkunu l-ħaddiema biss li jitilfu kif ġara f’postijiet
tax-xogħol oħra fejn dawn waqgħu għat-tixwix tal-egoiżmu.