News
L-GhUM tirringrazzja lill-poplu Malti
L-Għaqda
Unions Maltin (GħUM) irringrazzjat lil dawk l-eluf kbar li wieġbu għas-sejħa
tagħha u eluf kbar oħrajn li taw u qegħdin ikomplu jagħtu l-appoġġ sħiħ
tagħhom. Wegħdet ukoll li se tkompli tagħmel dak kollu possibbli skont il-liġi
biex tħares l-interessi tal-ħaddiema u l-familji tagħhom.
Intant, fi stqarrija li ħarġet, l-Għaqda
Unions Maltin ikkun-dannat mingħajr riserva l-insulti u diskors mhux xieraq
fil-konfront tal-PM u xi membri parlamentari li saru minn sezzjoni żgħira ta’
nies li kienu jagħmlu parti mill-folla kbira waqt li nhar it-Tnejn, waqt li
kienu qegħdin jiġu ppreżentati ittri dwar it-tariffi tad-dawl u l-ilma lil kull
membru parlamentari.
“Dan il-grupp ta’ nies irresponsabbli m’għandu bl-ebda mod iħassar dak li
rajna fil-Belt Valletta, il-Ħadd, 28 ta’ Frar, meta folla enormi ta’ eluf kbar
ta’ ħaddiema u familji preokkupati bit-tariffi esaġerati tad-dawl u l-ilma
daħlu l-Belt jimmanifestaw u jipprotestaw b’mod dinjituż u ċivili kif hu
mistenni f’soċjetà ħielsa u demokratika bħalma hi s-soċjetà Maltija,” qalet
l-GħUM.