News

Geitu Mercieca aggredit:Il-GWU turi solidarjetà mal-uffiċjal tagħha

L-Amministrazzjoni Ċentrali tal-General Workers’ Union (GWU) flimkien mal-uffiċjali u ħaddiema tal-Unjin, ilbieraħ esprimew is-solidarjetà tagħhom mad-Deputat Segretarju Ġenerali tal-GWU, Geitu Mercieca, wara li dan safa aggredit l-Erbgħa filgħaxija f‘restorant il-Belt Valletta.

Il-GWU kkundannat bla riservi l-aġir tal-aggressur li ġie identifikat bħala Charles Vella, li kien impjegat tal-Unjin sakemm dan tkeċċa mill-impjieg għal raġunijiet serji ħafna. Jirriżulta li wara l-inċident, Vella ġie arrestat b’konnessjoni ma’ din l-aggressjoni u nżamm taħt arrest fuq ksur tal-kundizzjonijiet imposti mill-Qorti tal-Maġistrati, f’kawżi kriminali separati.

Il-GWU tirringrazzja lil dawk kollha li wrew is-solidarjetà tagħhom mal-uffiċjal tagħha li safa vittma ta’ reat kriminali.

Fl-istess ħin tesprimi d-dispjaċir tagħha li l-midja tal-PN għażlet li tuża din l-aggressjoni għal skopijiet partiġġjani u bħal donnha riedet tiġġustifika r-reat kriminali, bil-fatt li Charles Vella kien tkeċċa mill-impjieg.

Sadanittant, ilbieraħ sar magħruf li l-aggressur tas-Sur Mercieca baqa’ jin-żamm arrestat u se jitressaq il-Qorti dalgħodu b’konnessjoni mal-attakk.

L-aggressur attakka lis-Sur Mercieca nhar l-Erbgħa li għadda, ftit qabel is-6.00 p.m. mbagħad ħarab minn fuq il-post. Malli sar rapport dwar il-każ, fl-Għassa tal-Pulizija tal-Belt, diversi pulizija għamlu tfittxija intensiva għall-aggressur f’diversi stabbilimenti fil-Belt sa-kemm inqabad u ġie arrestat.

Is-Sur Mercieca kellu jiddewwa fiċ-Ċentru tas-Saħħa tal-Floriana minħabba l-ġrieħi li ġarrab fl-attakk.