News
Tony Zarb: Ħadd mhu se jagħlaqli ħalqi!
Mistoqsija:
X’jissejjaħ min imur kontra l-wegħdi tiegħu stess u kontra r-rieda tal-poplu li
qed jirrappreżenta?! Tony Zarb: Ħadd mhu se jagħlaqli ħalqi!
Wara
li nhar t-Tnejn fil-Parlament id-Deputat Nazzjonalista Robert Arrigo talab
lill-Ispeaker jindaga u jieħu passi kontra Tony Zarb, is-Segretarju Ġenerali
tal-General Workers’ Union, għax dan stqarr li l-membri tal-Gvern huma
tradituri tal-poplu, is-Sur Zarb iddikjara li min iwiegħed u ma jwettaqx ikun
qed imur kontra r-rieda tal-poplu li jirrappreżenta u għalhekk ikun qed
iwassal għal tradiment.
Min qed jara lill-poplu jbati u bil-vot tiegħu fil-Parlament jaqbel li jkompli
jgħabbi piżijiet fuqu kuxjenzjożament ikun qed jittradixxi b’għemilu. Meta
dawk magħżulin mill-poplu biex jirrappreżentawh fil-Parlament jivvotaw
kontra r-rieda tal-istess kostitwenti tagħhom ikunu wkoll qegħdin jittradixxu
l-istess fiduċja murija fihom.
Min ma jridx jittradixxi lill-kostitwenti tiegħu jrid jagħżel bejn is-siġġu
parlamentari u l-fiduċja fil-poplu.
Fl-aħħar nett, is-Segretarju Ġenerali tal-GWU ddikjara li l-ebda attentat
mill-istess Arrigo jew sħabu fil-Parlament mhu se jagħlaqlu ħalqu jew iżommu
milli jesprimi ruħu favur il-poplu Malti u kontra min illum qiegħed
jittradixxih.
Id-dritt tal-espressjoni jipprevali fiċ-ċirkostanzi u l-poplu se jkun qed
jinnota min qed jagħmel tentattivi biex jagħlaq ħalq l-unjins.