News
Turija ta’ solidarjetà mas-Segretarju Ġenerali tal-GWU
Wara
li l-Membru Parlamentari Nazzjonalista, Robert Arrigo talab lill-Ispeaker
tal-Parlament biex jieħu passi kontra s-Segretarju Ġenerali tal-General
Workers’ Union, Tony Zarb, għax stqarr li l-Membri Parlamentari tal-Gvern kienu
tradituri tal-poplu meta dawn bil-vot tagħhom ħallew lill-poplu mgħobbi
bil-piżijiet tad-dawl u l-ilma u li ma wettqux dak li wegħdu, kienu bosta dawk
li wrew is-solidarjetà tagħhom ma’ Tony Zarb u komplew jagħmlulu kuraġġ biex
ikompli b’ħidmietu favur il-poplu.
Il-messaġġi ta’ solidarjetà ma’ Tony Zarb waslu minn diversi oqsma tal-ħajja
fosthom ħaddiema u pensjonanti membri tal-GWU, li magħhom ingħaqdu wkoll
grupp ta’ shop stewards ġodda tal-GWU li lbieraħ temmew kors intensiv ta’
erbat ijiem.
Kienu wkoll ħafna dawk is-self-employed u membri ta’ unjins oħrajn li esprimew
solidarjetà mas-Segretarju Ġenerali tal-GWU.
Saħansitra kien hemm anke membri tal-kleru, diversi professjonisti u nies
oħrajn li lkoll urew is-solidarjetà tagħhom.
Fl-istess waqt ukoll, bosta oħrajn stqarrew li dawn l-attentati m’huma xejn
għajr sforzi biex jagħlqu ħalq min bil-provi qed jiddefendi lill-poplu.
F’kumment li ta lil l-orizzont, Tony Zarb filwaqt li rringrazzja lil kull min
b’xi mod wera s-solidarjetà tiegħu miegħu, stqarr li ma kienx qiegħed jistenna
din is-solidarjetà min-naħa tal-po-plu u wiegħed li hu, flimkien ma’ sħabu se
jibqa’ għaddej bil-ħidma tiegħu favur il-poplu jkunu xi jkunu ċ-ċirkostanzi.