News

Esperjenza unika għaż-żgħażagħ tal-GWU Youths fil-belt ta’ Napli

Fl-aĦĦar jiem il-membri tal-eżekuttiv tal-GWU Youths kienu mistednin f’Napli mill-Unjin Taljana CGIL. Din l-istedina saret wara li fix-xahar ta’ Frar il-GWU Youths ospitat grupp ta’ żgħa­żagħ fi ħdan din l-akbar trejdunjin Taljana biex jagħm­lu es­perjenza ta’ ftit jiem f’pajjiżna. Għaż-żgħażagħ tal-GWU Youths din iż-żjara f’Napli mhux biss serviet biex iżuru di­versi postijiet tax-xogħol imma wkoll biex jiltaq­għu ma’ żgħa­żagħ oħrajn attivi fil-kamp trejd­unjonistiku.

L-ewwel jum f’Napli beda bi żjara fil-Power Station tal-kum­panija Tirreno Power fejn kie­nu spjegati l-isfidi li mhux biss kellha tiffaċċja l-kumpanija imma wkoll il-ħaddiema meta nbidlet is-sistema tal-ġenerazzjoni tal-elettriku. Ir-rappre­żen­tant tal-ħaddiema spjega li t-tibdil fis-sistema kien ifisser li l-kumpanija kellha bżonn inqas persuni biex iħaddmu l-impjant iżda b’taħdidiet kontinwi rnexxielhom isibu soluz­zjoni għall-ħaddiema anke fi żmien meta kienet qiegħda tiġi installata s-sistema. Lant tax-xogħol ieħor li żaru ż-żgħażagħ Maltin kien sit ta kostruzzjoni fiċ-ċentru ta’ Napli fejn qiegħda tinbena Metro Station ġdida. Hawnhekk il-ħaddiema qegħdin ikollhom jagħtu attenzjoni partikolari għal dak li jagħmlu għax fis-sit instabu diversi fdalijiet storiċi.

Matul il-jum tal-Ġimgħa l-eżekuttiv tal-GWU Youths ilta­qa’ ma’ numru ta’ żgħażagħ li qegħdin isegwu kors f’livell ta’ masters organizzat mis-sez­zjoni responsabbli mit-taħriġ u l-edukazzjoni fi ħdan is-CGIL. L-intenzjoni ta’ dawn iż-żgħażagħ, li diġà daħlu fid-dinja tax-xogħol, huwa li fil-futur jingħataw rwol aktar im­portanti fl-unjin.

Fl-ewwel sezzjoni ta’ din il-laqgħa ż-żgħażagħ Taljani għam­lu sensiela ta’ preżen­tazzjonijiet mill-aktar interes­santi fejn wara li wettqu r-ri­ċer­ka neċessarja spjegaw il-veduti tagħhom dwar kif jista’ jkun hemm titjib fis-servizzi soċjali, fl-iżvilupp sostenibbli u fl-unjin innifisha biex il-ħidma fiż-żmien li ġej tkun aktar effettiva u relevanti.

Preżenti għal din il-laqgħa kien hemm id-Deputat Segre­tarju Ġenerali tal-GWU Michael Parnis li f’diskors li għa­mel enfasizza l-importanza taż-żgħażagħ fl-unjins filwaqt li wassal messaġġ ta’ kuraġġ lill-istudenti tac-CGIL li qegħdin jittammaw li jingħataw rwol akbar fl-unjin. Fi kliem Michael Parnis ir-relazzjoni tajba bejn il-GWU u CGIL mhux biss hija riflessa fit-tpartit li jsiru bejn iż-żgħażagħ imma wkoll fil-ħidma li titwettaq fuq livell Ewropew.

Min-naħa tiegħu s-Segretarju Ġenerali tac-CGIL Campan­ia Michele Gravano ukoll tkellem dwar il-ħidma li qiegħda titwettaq fuq livell Ewropew fosthom mal-unjin Maltija GWU. Michele Grava­no tkellem dwar l-isfidi li qegħdin jiffaċċjaw il-ħaddiema Taljani f’dawn iż-żminijiet li wħud min­­nhom huma simili għal dawk li qegħdin jiffaċċjaw ħad­diema oħrajn fl-Ewropa, in­kluż Malta. F’din l-okkażjoni s-Segretarju tal-GWU Youths Malta, Vince Marmara u s-Seg­retarju Internazzjonali Priscilla Muscat ħadu l-okkażjoni biex jirringrazzjaw lill-unjin Tal­ja­na ta’ din l-opportunità u għall-akkoljenza.

F’Napli ż-żgħażagħ Maltin kellhom l-okkażjoni wkoll iżu­ru diversi postijiet kulturali bħal Pompei u l-Mużew Naz­­zjonali. Iż-żjarat fuq il-lan­tijiet tax-xogħol, il-laqgħat maż-żgħa­żagħ tac-CGIL u ż-żja­­rat kulturali għamlu ż-żjara f’Nap­li esperjenza unika għaż-żgħa­żagħ fi ħdan il-GWU Youths.